Талдықорған қаласы «Көктал» шағын ауданына көгілдір отын берілді. Көкталдықтар бірнеше жыл күткен табиғи газға алғашқы болып 15 тұрғын үй қол жеткізді. Осы айдың соңына дейін газға 600-дей абонентті қосу жоспарланған. Жалпы бұл шағын ауданда 1700 абонент бар.

Газ құбырын тарту жобасы 2018 жылы басталып, іске асырылуы біразға созылған еді. Өткен жылдың соңғы айында облыс әкімі Қанат Бозымбаев Талдықорған қаласын аралау барысында бұл мәселеге ерекше назар аударып, мердігер мекеме тарапынан жіберілген барлық кемшіліктерді түзеп, 2022 жылдың басында ауылға көгілдір отын беруді тапсырған болатын. Қабылданған шаралардан кейін газ құбырының беріктігі мен саңылаусыздығын тексеру жұмыстары аяқталып, елді мекенге көгілдір отын берілді.

Алғашқылардың бірі болып газдың игілігін көре бастаған көкталдық тұрғын Шакура Бекежанова өз ойымен бөлісті. «Көптен күткен арманымыз орындалды. Бұрын бір маусымда 10 тоннаға дейін көмір жағатынбыз. Үйді көмірмен жылыту бір жағынан шығынды болса, екінші жағынан көмір тасып, күл шығарудың азабы көп. Сол қиындықтан құтылып, тұрмыс тауқыметінің жеңілдегеніне қуанып отырмыз», – деді ол.

Сол сияқты шағын ауданның ардагер тұрғыны Оңалбай Жексембинов те қуанышын жасырмады. «Таяуда ғана үйімізге табиғи газ қосылды. Енді көмір жағып, пеш тазалап әуреленбейміз, отынымыз бір қысқа жете ме деп те уайымдамаймыз. Отбасымызбен түгел қуандық. Әсіресе, егде жастағы адамдар үшін бұл үлкен қуаныш», – деді қария.

Облыстық энергетика және тұрғын үй-коммуналдық шаруашылығы басқармасының мәліметінше, 8 мың тұрғыны бар «Көктал» шағын ауданына газ тарату жүйесі Талдықорған қаласын газдандырудың IV кезегі аясында салынған. Құбырдың ұзындығы 60,3 шақырым. Оның жобасы мен құрылысы бюджет есебінен жүргізіліп, 700 млн. теңге көлемінде қаржы жұмсалды.

Бүгінде Талдықорған қаласын газдандыру ісі толығымен аяқталды. Қалада 54,3 мың абоненттің табиғи газға қосылуға мүмкіндігі бар, қазіргі кезде соның 30 мыңға жуығы қосылған. 2022-2023 жылдары қала маңындағы «Ынтымақ», «Жастар-2» шағын аудандарына газ тарту жұмысы жүргізіледі.

НҰРЛАН ҚҰМАР

ГАЗДАНДЫРУ

Көгілдір отын – ел игілігіне