Қаламгерлердің еңбегі бағаланды

Талдықорғанда Жетісу облысы әкімінің жүлдесіне өткізілген журналистер байқауының жеңімпаздары марапатталды. Тілшілер қауымына марапатты облыс әкімі Бейбіт Исабаев табыстады. Іс-шара «Қоғамда зияткерлік журналистиканың қалыптасуы» атты өңірлік медиа-форумының пленарлық сессиясы аясында өтті.

Өңір басшысы Бейбіт Исабаев құттықтау сөзінде БАҚ өкілдерінің өңірдің әлеумет­тік-экономикалық дамуына қосқан үлесін атап өтіп, кәсіби журналистиканың қоғамдағы орны ерекше екенін тілге тиек етті. Сол сияқты тележурналистер Нұртілеу Иманғалиұлының және Бейсен Құранбектің есімін есте қалдыру бағытындағы шараларға да тоқталды.

«Үздік телеарна материа­лы» номинациясында «Жетісу» телеарнасының журналисі Еркебұлан Жақыбай, «Үздік баспа материалы» аталымында «Казах­станская правда» газетінің тілшісі Жанар Мықтыбаева озық шықты. «Үздік электрондық БАҚ материалы» номинациясы бойынша «Egemen Qazaqstan» тілшісі Мұхтар Күмісбек, «Үздік әлеуметтік желі ма­териалы» но­ми­нациясын­да «Jetіsу» газетінің тілшісі Күлжиған Тұрсынова жеңімпаз атан­ды. Үздік оператор және кинорежиссер ретінде Ерлан Ошақ­паев, ал үздік фототүсірілім жасаған «Jetіsу» газетінің фото­тілші­сі Жұмабай Мұсабеков деп танылды.

Өңірлік журналистиканың дамуына қосқан үлесі үшін Жазушылар одағы өңірлік фи­лиалының төрағасы, ардагер журналист Әміре Әрін марапат­талды. Ал Бейсен Құранбек атындағы сыйлық – «Кәсіби шебер­лігі үшін» номинациясы «Жетісу» телеарнасының жур­налисі Аяулым Мадикано­ваға бұйырды. Осы ретте атап өтсек, Талдықор­ған қаласын­да Журналистер үйіне белгілі теле­журналист Бейсен Құранбек­тің есімі беріліп, естелік тақта ашылған болатын. Әр жеңімпазға 500 мың теңге сомасына ақша сер­­ти­фикаты мен диплом табыс­талды.

Журналист Данияр Сей­сенбаев модераторлық еткен медиа-форумның панельдік сессиясында спикерлер замана­уи журналистиканы дамытудың өзекті тақырыптары жөнінде сөйледі.

НҰРЛАН ҚҰМАР