Үздік шабандоздар анықталды
Алматы қаласында «Orange BeNeLux Bicycle Tour» атты дәстүрлі велошеру өтті. Нидерланды Корольдігі елшілігінің бастамасымен, Қазақстан велосипед спорты федерациясы мен Қазақстан триатлон федерациясының ұйымдастыруымен және Алматы әкімдігінің қолдауымен өткізілген жарыстың жалпы қашықтығы 15 шақырымды құрады.
Дәстүрлі жарысқа 600-дан астам адам қатысты. Велошеруге қатысушыларды Нидерланды Корольдігінің елшісі Андрей Карстенс, Алматы қаласы спорт басқармасы басшысының орынбасары Бекжан Нұрланұлы және Қазақстан велоспорт федерациясының спорт менеджері Матвей Никитин құттықтады. Олар қатысқандардың барлығына алғыстарын білдіріп, велосипедтің денсаулық пен қоршаған орта үшін маңыздылығын атап өтіп, осындай іс-шаралардың жиі болатынына сенім білдірді.
Велошеру аяқталғаннан кейін лотерея ойнатылды, онда тіркелген қатысушылар арасында «Тассай», «Лотте Рахат» АҚ сыйлықтары, «Karcher» және «Dakam»компанияларынан велосипед үшінқұрал-жабдықтар, сондай-ақ велоспорт федерациясы мен Нидерланды Корольдігі елшілігінен 2 велосипед ойнатылды.
Одан кейін «AlmaU» университетінде Алматыдағы велосипедпен жүру мәдениеті мен инфрақұрылымы туралы панельдік пікірталас өтті. Сарапшылар Елена Ерзакович (Алматы қаласының көлік саясаты саласындағы тәуелсіз сарапшысы), Владислав Филатов (GRADOBLOG) және Диас Маратұлы (Urban Forum Kazakhstan) Алматыдағы велоинфрақұрылымды бағалап, велоқозғалыс пен веложолдардың қауіпсіздігін, қысы-жазы екі доңғалақты көлікпен жүру жағдайларын талқылап, көрермендердің сұрақтары мен пікірлеріне жауап берді. Сондай-ақ тұрақты және велосипед ұтқырлығы бойынша нидерландтық сарапшы Сьорс Ван Дюреннің бейнедәрісінен үзінділер көрсетілді. Талқылауды елшіліктің қолдауымен урбанизация саласында мамандандырылған Urban Forum Kazakhstan тәуелсіз ұйымы және оның жетекшісі Әділ Нұрмақов ұйымдастырды.
НҰРЛАН ҚҰМАР