Сандық теңге сынақтан өткізілмек

Мемлекет басшысының тапсырмасын  жүзеге асыру мақсатында Ұлттық банк цифрлық теңгені енгізу қажеттілігі туралы ұсынылатын шешімді әзірлеу үшін және кешенді зерттеуді қамтамасыз ету, сондай-ақ ұлттық цифрлық валютаны ықтимал енгізуден түсетін пайда мен шығындарды айқындау мақсатында цифрлық теңгені енгізу жөнінде шешім қабылдау моделін әзірледі.

Былтыр Ұлттық банк қаржы нарығы қатысушыларымен, сарапшылар қауымдастығы­мен және халықаралық серік­тестермен ынтымақтаса отырып, «Цифрлық теңге» қа­натқақты жобасын жүзеге асырды. Биыл сандық платформаны енгізу бағытындағы зерттеу жұмыстары жалғасын тауып, күні кеше Ұлттық банк пен Төлем және қаржылық технологияларды дамыту орталығы «Цифрлық теңгені енгізу бойынша шешім қа­былдау моделі» баяндамасын жариялады. Осы реттегі зерттеу нәтижелерінің негізінде биыл жылдың соңына дейін  елімізде  Орталық банктің цифрлық валютасын енгізу туралы қо­ры­тынды шешім әзірленеді. Цифрлық теңгені іске қосу ту­ралы шешім қабылдауда­­ғы басымдық – төлем қызмет­те­рін тұтынушылар үшін нәти­женің  тиімді болуы. «Талдау құралдары ретінде техно­ло­гиялық эксперименттер, экономикалық модельдеу, мүдделі тараптармен дизайн-сессиялар қарастырылған. 2022 жылдың 4-тоқсанында на­рыққа қатысушылармен және тұты­нушылармен цифрлық теңгенің технологиялық плат­фор­масын өтпелі тестілеу жос­­­­парланған. Зерттеу нәти­­желерін объективті түсіндіру мақсатында тәуелсіз халық­аралық сарапшылар мен ха­лық­аралық қаржы ұйымдары қызметкерлерінің қатысуымен «Цифрлық теңге» жобасының консультативтік кеңесі құры­лды», делінген Ұлттық банк ха­бар­­ла­масында.

Қаржы нарығы қатысу­­шы­ларымен цифрлық теңгенің экожүйесін құру да жобаны дамытудағы табыс­тылықтың маңызды факторы болып табылады. Осы мақсатта ұлттық цифрлық валютаны енгізу мәселелерін бірлесіп зерттеу үшін барлық мүдделі тарап­тарды біріктіретін Digital Tenge Hub коллаборативті алаңы іске қосылды. Оған на­рық қатыс­у­шылары, инфра­құрылымдық ойыншылар, халық­аралық се­ріктестер қаты­сады.

Цифрлық теңгені енгізу төлем мен қаржылық қызмет­тердің қолжетімділігін арттырады десек, офлайн төлеу мүмкіндігі арқылы бұл тиімділік тіпті жақсара түспек. Цифрлық теңге инфрақұрылымы қаржы нарығына қатысушылар мен мемлекеттік органдар үшін  смарт-контракт технологиясы негізінде инновациялық қызметтерді құруға мүмкіндік беретін қосымша құралға айналады. Цифрлық теңгені енгізу  болашақта трансшекаралық төлемдердің де тиімділігін  еселей түспек.

БЕКЕТ КӨКЕНАЙҰЛЫ