«Текелі-Граниттің» табысты тарихы

Алматы облысындағы моноқала – Текеліде экономиканы дамыту бағытында елеулі жұмыстар атқарылуда. Қазір мұнда 1411 кәсіпорын жұмыс істеп, осы өнеркәсіп орындары мен шаруа қожалықтарында және шағын, орта бизнесте 4 мыңдай адам еңбек етеді. Сол іргелі кәсіпорындар қатарында «Текелі Гранит» ЖШС да бар. Бұл кәсіпорынның отандық нарықта жұмыс істегеніне 15 жылдан асты. Табиғи тастарды өңдеуге, гранит пен мәрмәрдан бұйымдар жасауға маманданған кәсіпорын құрылыс материалдарын өндіру ісіне де елеулі үлес қосып келеді.

«Текелі Гранит» ЖШС заманауи технологиямен экология­лық талаптарға сай жұмыс істейді. Мұнда қолданылатын италиялық құрал-жабдықтар мен материалдар өнім сапасының халықаралық стандарттарға сай болуына мүмкіндік береді.

Кәсіпорын директоры Владимир Стрельцовтың айтуын­ша, өнеркәсіп алаңында өнімнің 35 түрі шығарылады. Атап айтқанда, модульді және жылтыратылған плиткалар, брусчатканың бірнеше түрі, жол бордюрлері, баспалдақтар, түрлі сәулеттік фигуралар, соның ішінде субұрқақтар және басқа да көптеген бұйымдар бар. Зауыттың қуаты 24 мың м2 гранит бұйымда­рын, 20 мың км жол бордюрлерін, 40 мың км жиектас өндіруге қауқарлы. «Текелі-Гранит» өндіретін өнімдер елімізде үлкен сұранысқа ие.

«Біз айына 2500 шаршы мо­дуль­дік плита шығара аламыз. Түрлі түс­тегі және түрлі көлемдегі өнімдерді өндіруге қажетті шикізатты Қапал-Арасан, Күрті, Қордай, Желтау ай­мақ­тарынан жеткіземіз. Біз үшін ең маңыздысы – өнімдеріміздің сапасы. Сондықтан бастапқы материалға ерекше мән береміз. Біздің грантттік жылтыратылған бұйымдарымыз облыс орталығындағы орталық алаңды абаттандыру кезінде, Алматы қаласының 2 жол айырығының құрылысында, астанадағы Сулы-Жасыл бульварды абаттандыру барысында қолданылды. Өндіріс процесінде бірінші кезекте тұтынушылардың сұ­ранысын қанағаттандырамыз, дайындалатын өнімнің түсі мен формасы соған байланысты. Заманауи және экологиялық талаптарға сәйкес болуы біздің өнімдеріміздің бәсекеге қабілеттілігін арттырып, одан әрі дамуымызға мүмкіндік береді», – деді кәсіпорын директоры В.Стрельцов.

Бүгінгі күні кәсіпорында 40 адам еңбек етеді. Олардың орташа ай­лық жалақысы 150 мың теңге шамасында. Мұндағы қызметкерлер коронавирус инфекциясына қарсы екпені алғашқылардың бірі болып салғызған. Бұл өз қауіпсіздігіміз үшін қажет дейді олар.

Кәсіпорын басшысы алдағы жос­парлары жайлы пікірін білдірді. «Жаңа технологиялардың көмегі­мен өндіріс көлемін арттырып, на­рықтағы позициямызды нықтай түссек дейміз. Қаланың өндіріс­тік секторын дамыту үшін жас ма­мандарды тартуға ниеттіміз. Мемлекет жасаған жағдайдың арқасында кәсіпкерлер өз ісін ашып, қалаған салада бизнесін жүргізуге мүмкіндігі бар. Бұл табысыңды арттыруға ғана емес,  кәсіби жағынан өсуге, өз-өзіңді жетілдіруге ықпал етеді. Бұл ел тәуелсіздігінің ең үлкен жетіс­тіктерінің бірі деп есептеймін», – деді ол.

Жетісу өңірінде өткен 8 айда қысқа мерзімді экономикалық индикатор 110,4 процентті құрады. Өңір экономикасына 370 млрд. теңге инвестиция тартылып, өсім 2,3 % құрады. Соның ішінде өңдеу секторы – 40,5 млрд. теңге немесе 124,5 %. Өнеркәсіп өсімінің көлемі – 13,8%, ауыл шаруашылығында – 1,1%, сау­дада – 20,5%, құрылыста – 16,6% жеткен.

                         НҰРЛАН ҚҰМАР