Бас жүлдемен оралды

Президент жанындағы Орталық коммуникациялар  қызметінде халықаралық «Славян базары-2021» өнер фестивалінің Гран-при жүлдесінің иегері Рухия Байдүкенованың қатысуымен баспасөз отырысы  өтті.

Мәдениет және спорт ми­нистрлігі Рухия Байдүкено­ваның халықаралық аренада еліміздің лайықты өкілі екен­дігіне қолдау көрсетсе, «Хабар» агенттігі «Славян базары – 2021» халықаралық өнер фести­валін тарату құқы­ғына ие бас ақпараттық серіктесі  болды.

«Қазақ елін бұл жеңіспен құттықтаймын. Біз ақпарат­тық демеушілігімізді фести­валь­дің ашылу, жабылу салта­натты рәсімдерін көрсетудегі «Хабар», «Хабар 24» арнала­рын­дағы жаңалықтарда халыққа  Рухияның жеңісі туралы ақпа­ратты тарату арқылы ба­рынша қолдау білдіруге тырыс­тық. Еліміздің жас та­лант­тарын «Хабар» агенттігі қашан да  қолдап келеді», – деді «Хабар» телеарнасының дирек­торы Динара Бисембина баспасөз отырысында.

Отыз елдің өкілдері бақ сынасқан байқаудың қазы­лар алқасы мен ұйымдас­тыру­шылары, биылғы  қатысу­шы­лар арасында бәсекелестік­тің  аса жоғары болғанын алға тартады. Екінші турда әншілер славян әндерін Беларусь елінің бас дирижері Виталий Куль­баков­тың басшылығымен орын­даған.

Бірінші конкурстық күннен кейін Рухия Байдүкенова 70 балдан 69 ұпай жинады. Қазылар алқасының ресейлік мүшесі Сергей Пенкин  қазақстандық орындаушыға 9 ұпай берсе, қалған  барлық мүшесі 10 ұпай мен бағалаған.

Тартысты өткен байқауда бас жүлдені қазақ қызы Рухия Байдүкенова жеңіп алды. Бірінші орын сербия­лық Ирина Арсениевичке бұйырса, екінші орынды украиналық Рената Штифель мен Даниил Мышковец алды. Үздік үштікті словак Иванна мен әзірбайжандық Тофиек Гаджиев бөлісті. Ал, байқаудың арнайы сыйлығы – «Славян үмітін» бірінші орын иеленген сер­биялық Ирина Арсиеневич алды.

Айта кету керек, биыл қазы­лар алқасының құрамында 2015 жылы «Славян базарының» бас жүлдесін жеңіп алған жер­лесіміз Димаш Құдайберген де болды.

Салтанат ҚАЖЫКЕН