Талаптыға нұр жауар
Ауылдардағы балалар футболының басты мәселелерінің бірі сапалы спорт алаңдарының, құрал-саймандардың және спорттық киімнің тапшылығы болып табылады.
Айжан ЖАСБАТЫРҚЫЗЫ
Осыған орай, Алматы облысы, Абай ауылындағы «Ауыл футбол» базасында Sun Finance холдингімен бірлескен ауылдық балалар футболын қолдауға бағытталған жобаның тұсаукесері өтті. Тұсаукесер барысында Sun Finance өкілдері «Ауыл футбол» жобасын дамытуға бағытталған 5 миллион теңге көлеміндегі сертификат ұсынды. Бөлінген қаржы 5 облыста (Алматы, Ақтөбе, Маңғыстау, Ақмола және Түркістан облыстары) «Sun Finance Cup»-тың 5 турнирін өткізуге бағытталады.
«Ауыл Футбол» әлеуметтік жобасы аталған мәселелерді шешуде өз үлесін қосуда. 2020-2021 жылы бірнеше ауылдарда шағын футбол алаңдары салынды, 30-дан астам ауылдық футбол клубтарына материалдық көмек берілді, сонымен қатар 7 турнир мен жаттықтырушыларға арналған семинарлар, балаларға арналған экскурсиялар мен турнирді қамтитын «Алматы облысындағы футбол Уик-енді» атты спорттық іс-шара ұйымдастырылды.
«Бізге жобаның ауылдағы балалар спортын дамыту идеясы ұнады. Біз үшін әлеуметтік тұрғыда бұл жобаға қатысу өте маңызды. «Ауыл футбол» спортты насихаттайды, бұл өз кезегінде бала тәрбиесінің маңызды қыры болып табылады. Біз осындай іске атсалысуға қуаныштымыз», – деп атап өтті Sun Finance Group-тың Орталық Азиядағы хабының бас директоры Виталий Нижегородцев.
Тұсаукесер рәсімінен кейін БАҚ саласында жұмыс істейтін қаламгерлер «Red Sapsans» атты балалар командасынан құралған футболшылармен жолдастық матчын өткізді. Ойын 2:2 тең есебімен тең түсті.