Орталық сайлау комиссиясы:ҮМІТКЕРЛЕР МЕН БАЙҚАУШЫЛАР ТІРКЕЛДІ
Кеше Орталық сайлау комиссиясының отырысы өтті. Оған саяси партиялардың, Бас прокуратураның, әділет, ішкі істер және қаржы министрліктерінің өкілдері, бейне-байланыс режимінде аумақтық сайлау комиссиялары, онлайн режимінде бұқаралық ақпарат құралдарының өкілдері қатысты.
Отырыстың күн тәртібінде 2021 жылғы 10 қаңтарға тағайындалған Қазақстан Республикасы Парламенті Мәжілісі депутаттарының кезекті сайлауына «Nur Otan» партиясының партиялық тізімін тіркеу және осы сайлауға халықаралық ұйымдардың байқаушыларын аккредиттеу туралы мәселе қаралды.
Отырысты ашқан Қазақстан Республикасы Орталық сайлау комиссиясының төрағасы Берік Имашев Мәжіліс депутаттығына кандидаттардың партиялық тізімдерін ұсыну мерзімі 30 қарашада сағат 18.00-де аяқталғанын еске салды. Партиялық тізімдерді Орталық сайлау комиссиясына бес саяси партия ұсынды.
Күн тәртібіндегі бірінші мәселе бойынша баяндама жасаған Орталық сайлау комиссиясының мүшесі Асылбек Смағұлов осы жылғы 26 қарашада Орталық сайлау комиссиясына «Nur Otan» партиясы» қоғамдық бірлестігі Қазақстан Республикасы Парламенті Мәжілісінің депутаттарын сайлауға кандидаттарды ұсыну туралы құжаттарды ұсынғанын хабарлады. Осы ретте соңғы 10 жыл ішінде ел аумағында тұрған, жасы 25-тен асқан, белсенді сайлау құқығына ие Қазақстан Республикасының азаматы Мәжіліс депутаты болып сайлану үшін кандидат болып тіркеле алады.
«Қазақстан Республикасындағы сайлау туралы» Конституциялық заңның 89-бабына сәйкес бір саяси партиядан тізімге енгізілген адамдардың саны саяси партиялар арасында бөлінетін депутаттық мандаттардың белгіленген санынан отыз пайызға аспайтын бір ғана тізімді тіркеуге жол беріледі.
Партиялық тізімде әйелдер мен жиырма тоғыз жасқа толмаған адамдардың саны оған енгізілген адамдардың жалпы санының кемінде отыз пайызын құрауға тиіс. «Nur Otan» партиясы қоғамдық бірлестігінің партиялық тізімінде 126 адам бар. Оның 40-ы әйелдер мен жиырма тоғыз жасқа толмаған адамдар, олар тізімге енгізілгендердің жалпы санының 31,7 пайызын құрайды.
Уәкілетті органдар ұсынған мәліметтер негізінде Орталық сайлау комиссиясы партиялық тізімге енгізілген үміткерлердің Конституция мен «ҚР сайлау туралы заңы» талаптарына сәйкестігін анықтады. Осыған байланысты, Ортсайлауком мүшелері «2021 жылғы 10 қаңтарға тағайындалған Қазақстан Республикасы Парламенті Мәжілісі депутаттарының кезекті сайлауында «Nur Otan» партиясының партиялық тізімін тіркеу туралы» қаулы қабылдады.
Күн тәртібіндегі екінші мәселе бойынша Ортсайлауком мүшесі Анастасия Щегорцова баяндама жасады. Ол «Қазақстан Республикасындағы сайлау туралы» Конституциялық заңның 20-2-бабына сәйкес шет мемлекеттердің, халықаралық ұйымдардың байқаушыларын аккредиттеуді Орталық сайлау комиссиясы Сыртқы істер министрлігінің ұсынуы бойынша жүзеге асыратынын атап өтті.
Қарашаның 20-сында Сыртқы істер министрлігінің ұсынуы бойынша Орталық сайлау комиссиясы ТМД Парламентаралық ассамблеясынан 29 байқаушыны аккредиттеді. 25 және 26 қарашада Сыртқы істер министрлігінен түскен 10 байқаушыны аккредиттеу туралы ұсыныс бойынша 6 байқаушы – Тәуелсіз мемлекеттер достастығынан байқаушылар миссиясы құрамында; 4 байқаушы – Ислам ынтымақтастығы ұйымы миссиясынан аккредиттеледі.
Баяндалғанды ескере отырып, Орталық сайлау комиссиясы «2021 жылғы 10 қаңтарға тағайындалған Қазақстан Республикасы Парламентінің Мәжілісі және мәслихаттары депутаттарының кезекті сайлауына халықаралық ұйымдардың байқаушыларын аккредиттеу туралы» қаулы қабылдады.
А.Щегорцова аккредиттеуге ұсыныстардың келіп түсуіне қарай байқаушылар бойынша деректер жаңартылып отыратынын атап өтті.
БЕКЕТ КӨКЕНАЙҰЛЫ